१९ चैत्रमा नेपाल- भारतका प्रधानमन्त्रीद्वारा रेलको उद्घाटन गर्ने तयारी

जनकपुरधाम- बहुप्रतिक्षित देशकाे एक मात्र रेल सेवाकाे नेपाल र भारतीय प्रधानमन्त्रीले संयुक्त रुपमा अनलाइनकाे माध्यमले उद्घाटन गर्ने भएका छन् ।
नेपाल रेल्वे कम्पनीका महाप्रबन्धक निरञ्जन झाले १९ चैत्रमा दुबै देशका प्रधानमन्त्रीद्वारा रेलको उद्घाटन गर्ने जानकारी दिए । उनले प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले जुम प्रविधिबाट उद्घाटन गर्ने कार्यक्रम रहेको बताए । यद्यपि रेल उद्घाटनको लागि जनकपुरधाममा भने एक विशेष कार्यक्रम आयोजना गरिने जानकारी दिए ।
यता जयनगर- जनकपुर- कुर्था रेल फागुन महिना भर दिनमा एकपटक यात्रु बिना ‘ड्राय रन’ गरेको थियो र संचालनकाे निश्चित नभएपछि चैत २ गतेदेखि एक दिन बिराएर यात्रुबिना जनकपुरधामको कुर्थादेखि जयनगरसम्म रेल चल्दै आएको छ।
रेल्वे अध्यादेश निष्क्रिय भएपछि उद्घाटन मिति तय हुन सकिरहेको थिएन । केही दिन अघि राष्ट्रपति विद्यादेवी भण्डारीले रेल्वे अध्यादेश पुनः जारी गरेपछि रेल सञ्चालनको सम्भावना बढेको हाे । रेल सञ्चालनका लागि प्राविधिक रूपमा सबै तयारी पूरा भइसकेकाे महाप्रबन्धक झाले जनाए ।