ढल्केवर- धनुषाको मिथिला नगरपालिकाले स्नातक तह (ब्याचलर) उत्तिर्ण नगरभित्रका छोरी र बुहारीलाई शुक्रवार सम्मान गरेको छ ।
‘‘मिथिलाको चाहना घर-घरमा साहाना’’ कार्यक्रम अन्तर्गत नगरभित्र जन्म भई बाहिर पालिकामा विवाह नभएका स्नातक उत्तिर्ण छोरी र मिथिला नगरपालिकामा विवाह भई आएका स्नातक उत्तिर्ण बुहारीलाई सम्मान गरेको छ ।
नगरपालिकाले ‘‘मिथिलाको चाहना घर-घरमा साहाना’’ कार्यक्रममा निवेदन दिएकामध्ये स्नातक उत्तिर्ण ११ जना छोरी र ५० जना बुहारी गरी जम्मा ६१ जना लाई सम्मान पत्र र ६ हजार नगद सहित सम्मान गरेको छ । सम्मान कार्यक्रममा सम्मानित हुने छोरी र बुहारीका अभिभावकहरुलाई समेत दोसल्ला ओढाई सम्मान गरिएको नगरपालिकाले जनाएको छ ।
मिथिला नगरपालिकाका नगर प्रमुख हरिनारायण महतोको अध्यक्षता तथा एमाले नेतृ एवं पूर्व मन्त्री जुली कुमारी महतोको प्रमुख आतिथ्यमा ढल्केवरको राधाकृष्ण मन्दिर प्राङ्गणमा सो कार्यक्रम गरिएको हो ।
कार्यक्रमलाई सम्बोधन गर्दै नेतृ महतोले शिक्षा विना शिक्षित, सभ्य र समृद्ध समाजको परिकल्पना गर्न नसक्ने बताईन् । उनी छोरीलाई उच्च शिक्षा पढाउन र त्यसपछि मात्र विहेवारी गर्न अभिभावहरुलाई आग्रह समेत गरिन् । छोरा छोरीको उच्च शिक्षामा विभेदकै कारण मधेश प्रदेश शिक्षामा पछाडि परेकाले अब छोरालाई पढाउने र छोरीलाई थोरै पढाएर घरजम गरिदिन प्रवृत्तिको अन्त गर्नुपर्नेमा जोड दिईन् ।
यस्तै कार्यक्रममा नगर प्रमुख महतोले मिथिला नगरपालिकाको घर -घरमा साहाना होस् र छोरीहरु पनि उच्च शिक्षा हासिल गर्नुपर्छ भन्ने सोचका साथ यस्ता कार्यक्रम ल्याएको बताउनुभयो । छोरीले उच्च शिक्षा अध्ययन गर्न थालेपछि कम उमेर अर्थात बाल विवाह पनि रोकिने र दक्ष तथा सक्षम हुने भन्दै आत्मनिर्भर बनाउन पालिकाले स्नातक उत्तिर्ण छोरी र बुहारीलाई मिथिलाको चाहाना घर- घरमा साहाना सम्मान गर्दै आएको जानकारी दिनुभयो । साहाना प्रधानको जीवनी सबैको प्रेरणाको स्रोत बनोस् भन्ने उहाँले शुभकामना समेत दिनुभयो ।
यस्तै सो कार्यक्रममा मिथिला नगरपालिकाका उपमेयर ताराकुमारी बस्नेत लामाले स्वागत मन्तव्य राख्दै महिलालाई उच्च शिक्षामा पहुँच र हौसला बढाउने तथा अभिभावकलाई पनि छोरीलाई उच्च शिक्षा दिनुपर्छ र पढाउनु पर्छ भन्ने उद्देश्यका साथ उनीहरुलाई सम्मान गरिएको बताईन् ।
आफु उपमेयरमा आएपछि महिलाहरुलाई उच्च शिक्षा अध्ययनका लागि आकर्षित गर्न र हौसला बढाउन आफ्नै पहलमा ‘‘मिथिलाको चाहना घर– घरमा साहाना’’ कार्यक्रम नगरस्तरीय कार्यक्रमा राख्दै र अगामी दिनमा पनि कार्यक्रमलाई निरन्तरता दिने विश्वास दिलाउनुभयो ।
मधेशका छोरीहरु उच्च शिक्षा नपढ्दै पढाई छोड्नु परेको, उमेर नपुग्दै अभिभावकले विवाह गर्नुपर्ने भएकाले बाल विवाह रोक्न पनि यो कार्यक्रम ल्याएको कार्यक्रममा स्वागत मन्तव्यको क्रममा उनले बताईन् । ’
प्रतिक्रिया दिनुहोस् !