काठमाडौँ — नेपाली कांग्रेसका सभापति एवम् प्रधानमन्त्री शेरबहादुर देउवाले केन्द्रीय समितिको निर्णय विपरीत सत्ता गठबन्धन दलसँग चुनावी तालमेलको प्रयास थालेपछि पार्टीभित्र असन्तुष्टि बढेको छ । चैत दोस्रो साता बसेको कांग्रेस केन्द्रीय समितिको निर्णय थियो- ‘स्थानीय अवस्था र आवश्यकताका आधारमा तालमेल गर्न सक्ने ।’
तर, महानगरपालिका र उपमहानगरपालिकाका स्थानीय नेता कार्यकर्ताको भावना विपरीत केन्द्रबाटै चुनावी तालमेल गर्ने प्रयास हुन थालेपछि नेता शेखर कोइराला समूहका नेताहरूले असन्तुष्टि जनाएका छन् । महामन्त्री गगनकुमार थापा सोमबारको गठबन्धन बैठकमा गएनन् ।
सभापति देउवाले कोइराला समूहबाट निर्वाचित महामन्त्री थापालाई गठबन्धनका बैठकमा बोलाउने गरेका छन् भने वरिष्ठ नेता रामचन्द्र पौडेल संयोजकत्वको कार्यदलमा समेत सदस्य छन् । सोमबार कार्यदल र गठबन्धनको संयुक्त बैठक बसेको थियो ।
स्रोतका अनुसार दिनभरिका कुनै पनि बैठकमा थापा सहभागी भएनन् । ‘आइतबारसम्म गगनजी पनि बैठकमा हुनुहुन्थ्यो तर सोमबारको बैठकमा उहाँ आउनुभएन,’ बालुवाटार बैठकमा सहभागी एक नेताले भने, ‘त्यसले कांग्रेस तालमेलको पक्षमा एक ढिक्का छैन भन्ने प्रस्टिएको छ ।’
नेता कोइरालाले सकेसम्म चुनावी तालमेल गर्न नहुने र गर्नै परे पार्टीको केन्द्रीय समितिको निर्णयबमोजिम मात्रै गर्न सकिने भन्दै आएका छन् । सभापति देउवा पक्षकै विभिन्न जिल्लाका नेताहरूको विरोधपछि केन्द्रीय समितिले स्थानीय अवस्था र आवश्यकतामा आधारित भएर तालमेल गर्न सक्ने भन्ने निर्णय लिएको थियो ।
तर, उम्मेदवारको मनोनयनको मिति नजिकिँदै गर्दा तालमेलको नाउँमा गठबन्धन दलहरूले केन्द्रबाट भागबन्डा गर्ने निर्णय गरेर कार्यकर्तामाझ लाद्ने देखिएको छ ।
सोमबार बिहान काठमाडौं क्षेत्र नं. ४ को प्रशिक्षण कार्यक्रममा महामन्त्री थापाले स्थानीय कार्यकर्ताको भावनाविपरीत केन्द्रले जबरजस्ती लाँदेको निर्णयले सकारात्मक नतिजा नआउने बताएका थिए ।
‘देशैभरिका साथीहरुले तालमेल गर्नुहुँदैन भन्ने मत राखिरहनुभएको छ । बरु हार्नु परे हारौँला तर रुखबाहेकमा भोट हाल्दैनौँ भनेर फोन आउँछ,’ उनले अघि भनेका थिए, ‘हुन पनि हो, दलीय व्यवस्थामा निर्वाचनपछि दलहरू मिलेर सरकार बनाउने कुरा स्विकार्न सकिन्छ । तर, निर्वाचनमा नै तालमेल गर्नु ठीक होइन । त्यसमाथि यो त स्थानीय चुनाव हो । स्थानीय नेता कार्यकर्ताको भावनाविपरीत कसरी गठबन्धन गर्ने ?’
महामन्त्री थापाले स्थानीयको भावनाविपरीत केन्द्रबाट निर्णय गरे त्यसको नतिजा राम्रो नहुने भनेका थिए । ‘हामीले केन्द्रबाट गठबन्धन थोपर्यौँ भने त्यसको नतिजा हामीले सोचेको भन्दा फरक आउन सक्छ । मैले गठबन्धन र पार्टीको शीर्ष बैठकमा यही कुरा राख्दै आएको छु,’ उनले भनेका थिए । देशभरका ५० भन्दा जिल्लाबाट तालमेल नगरौँ भन्ने सन्देश आएको महामन्त्री थापाको भनाइ थियो ।
सत्ता गठबन्धनमा छ महानगर र ११ उपमहानगरमा सिट भागबण्डाको प्रयास भइरहेको छ । तर, ती सबैजसो ठाउँबाट कांग्रेसका नेता कार्यकर्ताले तालमेल गर्न नसकिने भनिरहेका छन् ।
अहिलेसम्म नेपाली कांग्रेसका विराटनगर, वीरगन्ज र काठमाडौं महानगरपालिकाले चुनावी तालमेल नै आवश्यक नभएको निर्णय गरेका छन् भने भरतपुर, ललितपुर र पोखरा महानगरपालिकाले पनि कांग्रेसले मेयर नपाए गठबन्धन गर्न नसकिने अडान राखेका छन् । उपमहानगरमा पनि त्यस्तै विरोध छ ।
प्रतिक्रिया दिनुहोस् !