जनकपुरधाम- सत्ता गठबन्धनले जनकपुरधाम उपमहानगरपालिकाको मेयर जनता समाजवादी पार्टी (जसपा) लाई दिने सहमति गरेपछि नेपाली काँग्रेस जनकपुर सभापति मनाेजकुमार साहले पार्टी परित्यागकाे घाेषणाा गरेका छन्।
गठबन्धनकाे निर्णयले असन्तुष्ट बनेका जनकपुरधाम उपमहानगरपालिका कांग्रेस नगरसमिति सभापति मनोजकुमार साह लगायतका नेता–कार्यकर्ताले शुक्रबार सामूहिक राजीनामाकाे घोषणा गरेका छन्।
नगर सभापति साहले आज पत्रकार सम्मेलनकाे आयोजना गरि पार्टीको साधारण सदस्य समेत नरहने गरी राजीनामा दिएका हुन्।
साहले आफू सहित जनकपुरधाम वडा नम्बर १५ का वडा सभापति र सयभन्दा बढी क्रियाशील सदस्यहरूले राजीनामा गरेर पार्टी परित्यागको घोषणा गरेकाे जानकारी दिए।
उनले भने, ‘हामी कांग्रेसको साधारण सदस्य समेत नरहने गरी आज देखि पार्टीबाट सामूहिक राजीनामाको घोषणा गर्दैछौं।´ उनले राजीनामाको घोषणा गरेर मेयरका लागि स्वतन्त्रबाट उम्मेदवारी दिने घाेषणाा समेत गरे।
उनले पार्टीका कार्यकर्ताहरूको भावना बुझेर स्वतन्त्र उम्मेदवारी दिने निष्कर्षमा पुगेको जनाए ।
उनले भने, ‘मधेश प्रदेशको राजधानी जनकपुरधाम नेपाली काँग्रेसको उर्वर भूमि हो । जनकपुरधामको मेयर पदमा नेपाली काँग्रेसलाई नदिई जसपालाई दिने निर्णय आत्मघाती निर्णय हो । यस्ता निर्णयले नेपाली काँग्रेसले आफ्नो घरमा आगो लगाउने कार्य गरेको छ । काँग्रेस गढलाई समाप्त गर्ने प्रयास गरेको छ । काँग्रेस सभापति शेरबहादुर देउवालाई यस्तो गर्न नहुने थिए । त्यसपछि पनि निर्णय सच्याउन २४ घण्टे अल्टिमेटम दिएका थियौं, तर निर्णयलाई सच्याइएन । बैशाख ११ गतेभित्रमा निर्णय सच्याएमा काँग्रेस मै पुनः फर्किनेछु, अन्यथा स्वतन्त्राट उम्मेदवारीका साथै सधैंका लागि नेपाली काँग्रेस परित्याग गर्नेछौं ।’
जनकपुरधाम उपमहानगरपालिकाको २५ वटै वडामा नेपाली काँग्रेसकै चेहराको उम्मेदवार हुन्छ । तर चुनाव चिन्ह छाप स्वतन्त्रबाट हुन्छ साहले भने, काँग्रेसको यस्ता क्रियाकलापबाट नेपाली काँग्रेसमा आबद्धहरु असन्तुष्ट छन् । अहिलेपनि निर्णय सच्याउन समय बाँकी छ । समयमा काँग्रेसले निर्णय नसच्याएमा बाध्य भएर नेपाली काँग्रेस छोड्ने नै छौं । आजबाट आफू नेपाली काँग्रेसको झण्डा बोक्दैनौं ।’
उनले आसन्न स्थानीय तहको निर्वाचनमा नेपाली काँग्रेसकै चेहराले विजयी हुने विश्वास रहेको बताए ।
उनले स्वतन्त्र भएर लड्न साथीहरूले नै दिएको सल्लाह सुझाव अनुसार नेपाली कांग्रेसको रक्षाका लागि राजीनामा गरेर स्वतन्त्र उम्मेदवारी दिने निर्क्यौलमा पुगेको जनाए ।
मेयर जसपालाई दिने निर्णय सच्याउन साहले यसअघि २४ घण्टे अल्टिमेटम दिएका थिए। निर्णय सच्याउन शुक्रबार बिहान ११ बजेसम्म दिएको अल्टिमेटम सकिएपछि उनले पार्टीबाट राजीनामा गर्ने निर्णयमा पुगेकाे साहले जनाए ।
उनले स्वतन्त्र उम्मेदवार बने रूख चिन्ह नहुने भए पनि सबै कांग्रेसी मतदाताले आफूलाई मत दिने बताए। गृहमन्त्री एवं कांग्रेस नेता बालकृष्ण खाणले गठबन्धनको विरूद्धमा लाग्नेलाई कारबाही गर्ने अभिव्यक्ति दिएको भन्दै उनले आफू कांग्रेसको सदस्य नै नरहे कसैले कारबाही गर्न नसक्ने बताए।
अघिल्लो स्थानीय तह निर्वाचनमा पनि साह जनकपुरधामको मेयरमा चुनाव लडेर तत्कालीन राजपाका उम्मेदवार लालकिशोर साहसँग पराजित भएका थिए।
प्रतिक्रिया दिनुहोस् !