जनकपुरधाम- सलार्हीको हरिवनमा आफ्नो पार्टीबाट वडाध्यक्षका उम्मेदवारलाई सुनियोजित रुपमा बीस खुवाएर मार्ने षडयन्त्र गरेको भन्दै नेकपा माओवादी केन्द्रका कार्यकर्ताको विरोध प्रदर्शन गरेका छन् । विरोध प्रदर्शनको कारण हरिवन बजार तनावग्रस्त बनेको छ ।
माओवादी कार्यकर्ताले पूर्व-पश्चिम राजमार्गमा झण्डै दुईघण्टादेखि चक्काजाम सहित नाराबाजी गरिरहेका छन् । माओवादीका कार्यकर्ताले अहिले राजमार्गमा टायर बालेर नाराबाजी सहित प्रदर्शन गरिरहेका छन् ।
माओवादी कार्यकर्ताले पूर्व-पश्चिम राजमार्गमा झण्डै दुईघण्टादेखि चक्काजाम सहित नाराबाजी गरिरहेका छन् । माओवादीका कार्यकर्ताले अहिले राजमार्गमा टायर बालेर नाराबाजीसहित प्रदर्शन गरिरहेका छन् ।
आइतबार दिउँसो घरदैलोको क्रममा माओवादी केन्द्रको वडाध्यक्ष पदका उम्मेदवार शेख इस्तिहार सहितका उम्मेदवारलाई घरदैलोको क्रममा विपक्षी दलका कार्यकर्ताले मिठाईमा विष मिसाएर सेवन गराएको माओवादी केन्द्रले आरोप लगाएको छ ।
घरदैलोका क्रममा स्थानीयवासीले दिएको मिठाइ खाएपछि जिल्लाको हरिवन नगरपालिकामा माओवादीका ७ उम्मेदवार बिरामी परेका छन् । षडयन्त्रपूर्वक मिठाइमा विष राखिएको माओवादीले आरोप लगाएको छ।
हरिवनमा माओवादीका मेयर उम्मेदवार कमल बुढाथोकी र वडा नं. ११ का उम्मेदवार शेख इस्तेखार सहितको टोली पूर्वनिर्धारित कार्यक्रम अनुसार आज दिउँसो हरिवन बजार नजिकको मुस्लिम टोलमा घरदैलोमा हिँडेका थिए । केही स्थानीयले उम्मेदवारहरूको टोलीलाई मिठाइ तथा कोल्ड ड्रिङ्सले स्वागत गरेका थिए ।
उक्त घरदैलोमा सहभागी माओवादीका नगर कमिटी सचिव गौरी महतोका अनुसार मेयर उम्मेदवार बुढाथोकीले भने स्वास्थ्यको कारण देखाउँदै मिठाइ खाएनन् र अलि चाँडै त्यहाँबाट हिँडे तर मिठाइ खाएको पाँच मिनेटपछि वडाध्यक्षका उम्मेदवार शेख इस्तेखार बेहोस भएर ढलेका थिए । मिठाइ खुवाउने ती स्थानीय एमाले समर्थक भएको उनको दाबी छ ।
इस्तेखारसँगै अन्य उम्मेदवारहरू पनि छटपटाउन थालेपछि सबैलाई हरिवनकै स्वाभिमान अस्पतालमा लगिएको थियो । बिरामी भएका ७ जनामध्ये ५ जनाको प्राथमिक उपचारपछि अवस्थामा सुधार भयो । तर, वडाध्यक्ष इस्तेखार सहित दुई जनाको अवस्था गम्भीर देखियो । स्वाभिमान अस्पतालले उनीहरूलाई त्यहाँ उपचार हुन नसक्ने बताएपछि वीरगन्ज लगिएको छ ।
माओवादी कार्यकर्ताले एमालेले आफ्ना उम्मेदवारलाई मार्ने षडयन्त्र गरेको आरोप लगाएको छ । एमालेका मेयर उम्मेदवार निवर्तमान मेयर गणेश प्रसाईँ र ११ नम्बर वडाका निवर्तमान वडाध्यक्ष शेख मेहबुब रेजाको योजनामा यो षडयन्त्र भएको माओवादीको आरोप छ ।
एमालेले यस घटनाका विषयमा प्रतिक्रिया दिएको छैन । एमालेका मेयर उम्मेदवार गणेश प्रसाईँ घरदैलोका क्रममा रहेकाले सम्पर्कमा आउन सकेनन् । उनी निकट स्रोतले चाहिँ एमालेको षडयन्त्रणमा घटना भएको आरोप खण्डन गरेको छ ।
‘हामीमाथि लगाइएको आरोप मिथ्या हो,’ एमाले स्रोतले भन्यो, ‘उनीहरूलाई कसले के खुवायो भन्ने हामी जिम्मा लिन सक्दैनौँ । गर्मीले बेहोस भएका पनि हुन सक्छन् ।’
सो घटनाको केहीअघि माओवादीका मेयर उम्मेदवार बुढाथोकी र तत्कालीन विप्लव माओवादीका दिवङ्गत नेता कुमार पौडेलका भाइ हरिराम पौडेलबीच लफडा भएको थियो । कुमारकी श्रीमती अहिले बाग्मती नगरपालिकामा मेयरको स्वतन्त्र उम्मेदवार छिन् । कुमारको परिवारले उनको हत्यामा माओवादीका बुढाथोकीको हात रहेको आरोप लगाउँदै आएको छ ।
आज माओवादीको घरदैलोअघि हरिवनमा भेटिएका हरिरामलाई माओवादी कार्यकर्ताले हातपात गरेका थिए । स्वयम् बुढाथोकीले पनि आफूमाथि हात छोडेको भन्दै हरिरामले फेसबुकमा स्टातस लेखेर पोस्ट गरेका छन् ।
सोही घटनालाई ढाकछोप गर्न माओवादीले विषको प्रपोगण्डा निकालेको एमालेका एक स्थानीय कार्यकर्ताले बताए।
इलाका प्रहरी कार्यालय हरिवनका इन्सपेक्टर मुकेश ताम्राकारले घरदैलोका क्रममा माओवादीका केही उम्मेदवार बिरामी भएको रिपोर्ट आएको बताए । तर, के कारण हो भने अस्पतालले औपचारिक जानकारी नगराइसकेको उनको भनाइ छ ।
‘हामीलाई आएको जानकारी अनुसार अस्पताल आउँदा दुई जना बेहोस हुनुहुन्थ्यो भने पाँच जना सामान्य बिरामी हुनुहुन्थ्यो,’ ताम्राकारले भने, ‘यस विषयमा हामी थप बुझिरहेका छौँ ।’
हरिवन बजारमा नेपाल प्रहरी र सशस्त्र प्रहरीका दर्जनौं सुरक्षाकर्मी खटाईएको छ । प्रहरीले घटनाबारे अनुसन्धान भइरहेको र अहिल्यै एकीन विवरण भन्न नसकिने जनाएको छ ।
प्रतिक्रिया दिनुहोस् !