जनकपुरधाम- धनुषामा कुटपिटबाट एक युवकको मृत्यु भएको छ ।

धनुषाको शहिदनगर नगरपालिका वडा नम्बर ३ गोठकुहाका श्रीप्रसाद यादवका २१ वर्षीय छोरा गोबिन्द यादवको कुटपिटबाट मृत्यू भएको हो ।

मंगलबार बिहान साढे ६ बजे घर नजिकै ककर्लाको झाडीमा कुटपिटबाट गम्भीर घाइते भएको अवस्थामा गोविन्द फेला परेका थिए ।

उनको उपचारको क्रममा विराटनगर स्थित न्यूरो अस्पतालमा मृत्यू भएको इलाका प्रहरी कार्यालय यदुकूहाले जनाएको छ ।

अज्ञात समूहले सोमवार राती नै उनलाई कुटपिट गरी झाडीमा फालेर भागेको हुन सक्ने आशंका गरिएको छ ।

मंगलवार बिहान गम्भीर अवस्थामा फेला परेका गोविन्दलाई उपचारको लागि प्रादेशिक अस्पताल जनकपुर ल्याइएको थियो । तर यहाँ उपचार सम्भव नहुँदा थप उपचारको लागि बिराटनगर रेफर गरिएको थियो ।

उनको उपचारको क्रममा मृत्यू भएको परिवारजनले जनाएको छ ।

घटनामा संलग्न भएको हुन सक्ने आशंकामा प्रहरीले चारजनालाई पक्राउ गरिएको अनुसन्धान थालिएको छ । घटनामा संलग्न आरोपमा स्थानीय मुर्बल यादव सहित चार जनालाई पक्राउ गरिएको बुझिएको छ ।

घटना विषयमा थप अनुसान्धन भइ रहेको इलाका प्रहरी कार्यालय यदुकोहाका प्रहरी निरीक्षक संवित भण्डारीले जानकारी दिए ।