जनकपुरधाम- नेपाली काँग्रेसका प्रवक्ता डा.प्रकाशशरण महतले पाँच दलीय गठबन्धनका उम्मेदवारहरूको पक्षमा मुलुकभरि जनलहर देखिएकाले आगामी सरकार काँग्रेसको नेतृत्वमा बन्ने पक्का भएको बताएका छन् ।

नेपाल प्रेस युनियन धनुषाले आज जनकपुरधाममा आयोजना गरेको पत्रकार सम्मेलनमा प्रवक्ता डा.महतले काँग्रेसले कुरा कम गर्ने तर काम बढी गर्ने पार्टी भएकाले काँग्रेसको नेतृत्वमा बन्ने सरकारले विगतदेखि नै विकास निर्माणको काममा गति दिनुका साथै जनताको जनजीविकाको पक्षमा काम गरेको बताए।

उनले हुलाकी राजमार्गको निर्माणमा भएको व्यवधानलाई हटाएर गति दिएको र नागरिकता विधेयक ल्याउँदा नेकपा एमालेका अवरोधका कारणले लागु गर्न नसकेको बताउँदै काँग्रेसको नेतृत्वमा बन्ने अगामी सरकारले नागरिकता समस्याको समाधान गर्ने बताए।

प्रवक्ता डा.महतले मुलुकलाई तोड्ने तथा बिगार्ने शक्तिको पक्षमा नेपाली जनता नभएको भन्दै काँग्रेसले मुलुक तथा जनतालाई जोड्ने काम गरेको बताए।

उनले वर्तमान संविधानको रक्षा गर्दै संविधानको कमी कमजोरीहरूलाई संशोधन गरी संविधानको परिमार्जनको पक्षमा पार्टी भएको समेत बताए।

उनले कोरोना महामारीको समयमा मुलुक अस्तव्यस्त बनेको बेला कमिसनमा कुरा नमिलेपछि समयमा खोप खरिद नभएका कारणले धेरै जनताले अनाहकमा ज्यान गुमाउनुपरेको बताउँदै काँग्रेस नेतृत्वमा सरकार बनेपछि खोप खरिद भएर जनताको जीउ धनको रक्षा गरेको दाबी गरे।

काँग्रेसका प्रवक्ता डा. महतले विगतमा बिग्रेको परराष्ट्र सम्बन्धलाई वर्तमान गठबन्धन सरकार बनेपछि सुधार गरेर समानताको आधारमा सन्तुलित बनाउने काम गरेको बताए।