महोत्तरी - नेपाल कम्युनिस्ट पार्टी (माओवादी केन्द्र)का भरतप्रसाद साह पुनः मधेस प्रदेश संसदीय दलको नेतामा नियुक्त भएका छन् । पूर्वमन्त्री समेत रहेका साहलाई आज पार्टीका अध्यक्ष पुष्पकमल दाहाल ‘प्रचण्ड’ले पुनः दलको नेता तोकिएको जानकारी गराएका छन् ।

यस सम्बन्धमा अध्यक्ष दाहालद्वारा हस्ताक्षरित पत्र सभामुख रामचन्द्र मण्डललाई पठाइएको छ । पत्रमा भनिएको छ, “नेपाल कम्युनिस्ट पार्टी (माओवादी केन्द्र) मधेस प्रदेश संसदीय दलको नेतामा माननीय भरतप्रसाद साहलाई पुनर्स्थापित गर्ने निर्णय भएकाले उहाँलाई दल नेता कायम गरी दलको तर्फबाट प्रतिनिधित्व गराउन अनुरोध गर्दछु ।”

साह यसअघि पनि माओवादी केन्द्रको तर्फबाट संसदीय दलको नेता रहेर कार्यसम्पादन गरिसकेका छन् ।