जनकपुरधाम - लोकतान्त्रिक समाजवादी पार्टी (लोसपा) नेपालका अध्यक्ष महन्थ ठाकुरले नेपाली बाहेकका भाषाहरू अझै पनि जागिरको भाषा बन्न नसकिरहेको भन्दै गम्भीर चिन्ता व्यक्त गरेका छन् ।

मैथिलीका महाकवि विद्यापतिको स्मृति दिवसको अवसरमा साेमबार आयोजित कार्यक्रममा बोल्दै अध्यक्ष ठाकुरले सङ्घीय लोकतान्त्रिक गणतन्त्रात्मक व्यवस्था स्थापना भए पनि नेपाली बाहेकका भाषाहरूको विकास नहुनुको मूल कारण तिनलाई रोजगारी र सरकारी कामकाजको भाषा नबनाइनु रहेको बताए ।

‘मैथिलीसहित नेपालका अन्य भाषाले पनि यदि नेपाली भाषा सरह अवसर र मान्यता पाए भने ती भाषाहरूले द्रुत गतिमा विकास गर्न सक्छन्,’ ठाकुरले भने । 

उनले मैथिलीका महाकवि विद्यापतिको कृतित्वमाथि चर्चा गर्दै विद्यापति केवल मिथिलाको नभई सम्पूर्ण नेपालको साझा सांस्कृतिक धरोहर भएको उल्लेख गरे ।

कार्यक्रममा मधेस प्रदेशका मुख्यमन्त्री जितेन्द्र सोनलले संविधानमै देवनागरी लिपिमा लेखिने भाषाहरूलाई सरकारी कामकाजको भाषा बनाउने ध्येय रहेपनि व्यवहारमा नेपाली भाषालाई मात्रै प्रयोगमा ल्याइएको बताए ।

उनले भाषा आयोगको सिफारिसका आधारमा अन्य भाषाहरूलाई पनि सरकारी कामकाजमा प्रयोग गर्न सकिने सम्भावना रहेको बताउँदै यस विषयमा आशावादी रहन आग्रह गरे ।

सो अवसरमा लोसपाका नेता परमेश्वर साह, प्रवक्ता डा. आभाष लाभ, विभिन्न साहित्यकार तथा स्थानीयहरूको पनि सहभागिता रहेको थियो ।