महोत्तरी – मिथिलाञ्चलको मौलिक संस्कृति, परम्परा र दाजुभाइ तथा दिदीबहिनीबीचको अटुट प्रेमको प्रतीकका रूपमा मनाइने प्रसिद्ध पर्व सामा चकेवाको अवसरमा नयाँ साङ्गीतिक प्रस्तुति ‘SAMA – Music Video’ सार्वजनिक भएको छ।

Mithila Series युट्युब च्यानलमार्फत बिहीबार (१२ नोभेम्बर २०२६) सार्वजनिक गरिएको उक्त म्युजिक भिडियोले मिथिला क्षेत्रको मौलिक लोकसंस्कृति र परम्परालाई आधुनिक साङ्गीतिक शैलीमा प्रस्तुत गरेको छ।

सामा चकेवा पर्वको सांस्कृतिक महत्व, दाजुभाइप्रतिको माया, चेलीबेटीहरूको भावना तथा गाउँघरमा मनाइने परम्परागत उत्सवलाई भिडियोमा आकर्षक ढङ्गले चित्रण गरिएको छ। विशेषगरी ‘भैया के अंगना सामा खेलू’ जस्ता परम्परागत लोकभावनाले भरिएका शब्द र भाकाले दर्शकलाई मिथिलाको गाउँघर र आँगनको सम्झना गराउँछन्।

गीतमा पायल ठाकुर, सार्थी लामा, आरती झा र रुबी साहले स्वर दिएका छन्। गीतको म्युजिक एरेन्जमेन्ट तथा प्रोग्रामिङ र पुरुष र्‍याप सञ्जय कुशवाहाले गरेका छन् भने महिला र्‍याप अस्मिता रानी ठाकुर (Miss ART) ले प्रस्तुत गरेकी छन्। गीतको शब्द तथा सङ्गीत परम्परागत लोकभाकामा आधारित रहेको छ। गीतको अवधारणा Miss ART को रहेको छ।

भिडियोमा अस्मिता रानी ठाकुर (Miss ART), सार्थी लामा, आयुषा खड्का, प्रदीप यादव (बसिया भाट), अवधेश मण्डल, आर्या, सुस्मिता, लक्ष्मी र अनिता यादव लगायतका कलाकारहरूको अभिनय तथा प्रस्तुति रहेको छ।

भिडियोको निर्देशन मनीष मिश्रले गरेका छन् भने छायाङ्कन तथा सम्पादन रविन धनुवंशीले गरेका छन्। लाइट व्यवस्थापन सरोज ठाकुर, क्यामेरा सहायक अनिल महतो र बीटीएस चन्दन यादवले सम्हालेका छन्। निर्माण व्यवस्थापन Miss ART ले गरेकी छन्। भिडियोको कलर सञ्जय कुशवाहाले गरेका छन् भने रेकर्डिङ, मिक्सिङ तथा मास्टरिङ र पोस्ट-प्रोडक्सनको काम Mithila Series ले गरेको छ।

मिथिला संस्कृतिलाई नयाँ पुस्तासम्म पुर्‍याउने प्रयास

निर्माण टोलीले मिथिलाको मौलिक लोकसंस्कृति, परम्परा र पहिचानलाई संरक्षण गर्दै नयाँ पुस्तासम्म पुर्‍याउने उद्देश्यले ‘SAMA’ म्युजिक भिडियो निर्माण गरेको जनाएको छ। आधुनिक प्रविधि र प्रस्तुतिमार्फत परम्परागत सामा चकेवा पर्वको महत्वलाई थप व्यापक बनाउन भिडियोले योगदान पुर्‍याउने अपेक्षा गरिएको छ।

सामा चकेवा केवल एउटा पर्व मात्र नभई दाजुभाइ तथा दिदीबहिनीबीचको प्रेम, विश्वास, सद्भाव र पारिवारिक सम्बन्धलाई मजबुत बनाउने सांस्कृतिक उत्सवसमेत हो। यसै भावनालाई गीत तथा भिडियोमार्फत प्रस्तुत गर्ने प्रयास गरिएको छ।

Mithila Series Pvt. Ltd. को लेबलमा सार्वजनिक भएको यस भिडियोले मिथिला संस्कृतिप्रेमी दर्शक तथा संगीतप्रेमीहरूको ध्यान आकर्षित गर्ने अपेक्षा गरिएको छ।