औरही (महोत्तरी) – नेपाली कांग्रेसका पूर्वकेन्द्रीय सदस्य एवं औरही नगरपालिकाका पूर्वनगरप्रमुख सुनिलकुमार यादवले छठ पर्वको अवसरमा नगरपालिकाका नौवटै वडामा रहेका विभिन्न छठ घाटको अवलोकन गर्नुभएको छ।

छठ पर्वको मुख्य दिन आइतबार यादवले वडा नं. १ देखि ९ सम्म पुगेर स्थानीयवासीले छठ पूजाका लागि गरेको तयारी तथा घाटको व्यवस्थापनबारे जानकारी लिनुभएको हो।

अवलोकनका क्रममा उहाँले विभिन्न छठ घाटमा पुगेर व्रतालु महिला तथा पुरुष र स्थानीयवासीसँग भेटघाट गर्नुभएको थियो। सो अवसरमा उहाँले व्रतालु तथा श्रद्धालु भक्तजनसँग छठ पर्वको शुभकामना आदानप्रदान गर्दै सबैको सुख, शान्ति, समृद्धि र सुस्वास्थ्यको कामना गर्नुभयो। उहाँले विभिन्न घाटमा छठी मैयाको दर्शन तथा पूजाआराधनासमेत गर्नुभएको थियो।

पूर्वनगरप्रमुख यादवले छठ पर्व मिथिला तथा मधेशको मौलिक पहिचान, धार्मिक आस्था र सांस्कृतिक परम्परासँग अभिन्न रूपमा जोडिएको महत्वपूर्ण पर्व भएको बताउनुभयो। पुस्तौँदेखि चल्दै आएको यस पर्वको मौलिकता र परम्पराको संरक्षण गर्दै नयाँ पुस्तासम्म सांस्कृतिक पहिचान हस्तान्तरण गर्नुपर्नेमा उहाँले जोड दिनुभयो।

छठ धार्मिक आस्थाको पर्व मात्र नभई सामाजिक एकता, आपसी सद्भाव, सहयोग, अनुशासन र पारिवारिक सम्बन्धलाई थप सुदृढ बनाउने महत्वपूर्ण सांस्कृतिक पर्वसमेत रहेको उहाँको भनाइ थियो। जातजाति, वर्ग र समुदायबीचको विभेदभन्दा माथि उठेर सामूहिक रूपमा पर्व मनाउने परम्पराले सामाजिक एकता र भाइचारा अभिवृद्धि गर्न सहयोग पुर्‍याउने उहाँले उल्लेख गर्नुभयो।

नेपाली कांग्रेस औरही नगर सभापति मैथुलप्रसाद यादवले छठ पर्व धार्मिक, सांस्कृतिक तथा सामाजिक पहिचानसँग जोडिएको महत्वपूर्ण पर्व भएको बताउनुभयो। उहाँले यस पर्वले समाजमा आपसी सद्भाव, एकता र भाइचाराको भावना अभिवृद्धि गर्ने उल्लेख गर्दै यसको मौलिक परम्परा र सांस्कृतिक महत्वको संरक्षण गर्नुपर्नेमा जोड दिनुभयो। छठ पर्वलाई सभ्य, व्यवस्थित र मर्यादित रूपमा सम्पन्न गर्न स्थानीयवासी, युवा तथा सामाजिक सङ्घसंस्थाबीच सहकार्य आवश्यक रहेको उहाँको भनाइ थियो।

त्यसैगरी, नेपाली कांग्रेस औरही नगरपालिका–१ का वडा सभापति सुजितकुमार यादवले छठ पर्व धार्मिक आस्था, सामाजिक एकता र सांस्कृतिक परम्पराको महत्वपूर्ण प्रतीक भएको बताउनुभयो। उहाँले पर्वको मौलिकता र परम्पराको संरक्षणमा सबैको सक्रिय सहभागिता आवश्यक रहेको उल्लेख गर्दै छठ घाटको व्यवस्थापन तथा सरसफाइमा स्थानीयवासी र युवाको भूमिका महत्वपूर्ण हुने धारणा व्यक्त गर्नुभयो।

अवलोकनका क्रममा नेपाली कांग्रेसका नेता तथा कार्यकर्ता, नगर सभापति मैथुलप्रसाद यादव र विभिन्न वडाका वडा सभापतिहरूको सहभागिता रहेको थियो।

छठ पर्वको मुख्य दिन औरही नगरपालिकाका विभिन्न नदी, पोखरी तथा जलाशयका किनारमा निर्माण गरिएका छठ घाटमा श्रद्धालु भक्तजनको उल्लेख्य सहभागिता रहेको थियो। व्रतालुहरूले आइतबार साँझ अस्ताउँदो सूर्यलाई अर्घ्य अर्पण गर्दै विधिपूर्वक पूजाआराधना गरेका थिए। सोमबार बिहान उदाउँदो सूर्यलाई अर्घ्य अर्पण गरेपछि चार दिनसम्म मनाइने छठ पर्व सम्पन्न हुनेछ।