जनकपुरधाम- ३१ औँ अन्तर्राष्ट्रिय महिला हिंसा विरुद्धको १६ दिने अभियान अन्तर्गत सहिद महिला पत्रकार उमा सिंहलाई सम्मान गरिएको छ ।

पत्रकार सिंहका तर्फबाट सहकर्मी तथा नेपाल पत्रकार महासङ्घका मधेस प्रदेश उपाध्यक्ष ज्योति झा र जिल्ला कार्यवाहक अध्यक्ष अबधेश कामतलाई संयुक्त रुपमा जनकपुरधाम उपमहानगरपालिकाका मेयर मनोज कुमार साहले आज सम्मान पत्र प्रदान गरेका हुन् ।

जनकपुरधाममा महिला पत्रकार उमा सिंहलाई एक समूहले बीभत्स किसिमले हत्या गरेपछि सरकारले धनुषाका पत्रकारहरूले गरेको आन्दोलनपछि सिंहलाई सहिद घोषणा गरेको थियो ।

कार्यक्रममा जनकपुरधाम उपमहानगरपालिकाका नगर प्रमुख मनोज कुमार साहले सहिद महिला पत्रकार उमा सिंह साँचो अर्थमा साहसिक महिला पत्रकार भएको बताउँदै अन्यायका विरुद्धमा कलम चलाएकै कारणले उहाँको हत्या भएको बताए ।
अध्यक्षको आसनबाट बोल्दै सञ्जालका धनुषा अध्यक्ष एवं उमा सिंहलाई न्याय दिलाउनका लागि निःशुल्क कानूनी लडाई लड्नु भएका अधिवक्ता रेखा झाले सहिद पत्रकार उमा सिंहका हत्यारामाथि कारबाहीका लागि प्रयास गर्दा भोग्नु परेका धम्कीको विषयमा जानकारी दिईन् ।

कार्यक्रममा नेपाल पत्रकार महासङ्घका प्रदेश उपाध्यक्ष ज्योति झाले सहिद पत्रकार उमा सिंह आफूहरूको प्रेरणाको श्रोत भएको बताए ।

नेपाल पत्रकार महासङ्घ धनुषाका कार्यवाहक अध्यक्ष अबधेश कामतले सहिद पत्रकार उमा सिंहका सम्पूणर् दोषीमाथि हालसम्म पनि कारबाही नभएको बताइन्।

कार्यक्रममा राष्ट्रिय मानव अधिकार आयोगका मानव अधिकार अधिकृत रेखा दत्त, ओरेक नेपालका प्रदेश संयोजक विकास बन्जारा सहितका वक्ताहरूले १६ दिने अभियान अन्तर्गत विभिन्न प्रकारका जनचेतनामूलक कार्यक्रमहरू आयोजना गरिएको बताए ।