
महोत्तरी – निरन्तरको चिसोले महोत्तरीमा श्वासप्रश्वासका बिरामी बढेका छन्। जिल्लाका सबै भेगमा बिरामी बढेका स्थानीय अस्पतालले जनाएका छन्।
सदरमुकाम जलेश्वरस्थित प्रादेशिक अस्पतालमा बिरामीको चाप बढेको छ। बितेका सात दिनमा दैनिक एक सयभन्दा बढी बिरामी उपचारका लागि आइरहेका अस्पतालतका मेडिकल सुपरिटेन्डेन्ट डा. विकासकुमार साहले बताए।
उपचारार्थ आउने बिरामीमा पाँच वर्षमुनिका बालबालिका र ६० वर्षमाथि उमेरका बढी रहेका उनको भनाइ थियो।
बर्दिबास अस्पतालमा पनि बिरामी बढेका छन्। माघ लागेसँगै दैनिक एक सय १० देखि एक सय २५ जनासम्म बिरामी आउने गरेका बर्दिबास अस्पतालका मेडिकल सुपरिटेन्डेन्ट डा.सुदीपकुमार ठाकुरले जानकारी दिए। यहाँ उपचारार्थ आउनेमा महिलाको सङ्ख्या बढी रहेको डा ठाकुरले बताए।
जिल्लाका गौशाला र दक्षिवर्ती सम्सीस्थित प्राथमिक उपचार केन्द्रमा पनि बिरामीको चाप बढेको जिल्ला स्वास्थ्य कार्यालयका प्रमुख तथा वरिष्ठ स्वास्थ्य प्रशासक नवलकिशोर साहले जानकारी दिए।
निकै दिनदेखि तराईमा बाक्लो हुस्सु लागिरहेको छ। केही दिन घाम लागेर न्यानो भए पनि फेरि हुस्सु र कुहिरो लागेकाले महोत्तरी तथा आसपासका जिल्लामा जनजीवन कठिन बन्न थालेको हो।