महोत्तरी- जिल्ला प्रशासन कार्यालय महोत्तरीले आगामी केही दिनसम्म भारी वर्षाको सम्भावना रहेकाले उच्च सतर्कता अपनाउन सबैलाई आग्रह गरेको छ। गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणले १३ देखि १५ कात्तिकसम्म देशका विभिन्न स्थानमा भारी वर्षा हुने सम्भावना रहेको सूचनालाई आधार मानेर प्रशासनले चेतावनी जारी गरेको हो।

सहायक प्रमुख जिल्ला अधिकारी सञ्जय कुमार पोखरेलले जारी गरेको सूचनामा वर्षा तथा बाढी–डुबानको जोखिममा रहेका क्षेत्रका बासिन्दालाई उच्च सतर्कता अपनाउन र आवश्यक परे सुरक्षित स्थानतर्फ सर्न आग्रह गरिएको छ।

सूचनामा भनिएको छ-“भारी वर्षाको अवस्थामा सवारी साधन रोक्न, अत्यावश्यक कामबाहेक घरबाहिर ननिस्कन र विशेष गरी रातको समयमा यात्रा नगर्नुहोस्।”

त्यस्तै, जोखिमपूर्ण नदी किनारका बस्तीमा रहेका नागरिकलाई डुबान हुन सक्ने ठाउँ पहिचान गरी स्थानीय तहले तोकेको सुरक्षित स्थानमा सर्ने तयारी गर्न पनि प्रशासनले सुझाव दिएको छ।

प्रशासनले जिल्लाभरका सुरक्षा निकाय, स्थानीय तह तथा सरोकारवाला निकायहरूलाई कार्ययोजना अनुसार तयारी अवस्थामा रहन निर्देशन दिएको छ।

धानसहितका बाली वर्षाको जोखिममा नपर्ने गरी यथाशीघ्र भित्र्याउन किसानलाई पनि आग्रह गरिएको छ।

जिल्ला प्रशासन कार्यालयले नागरिकलाई सतर्क रहँदै सुरक्षालाई प्राथमिकता दिन र कुनै पनि आपतकालीन अवस्था देखा परेमा स्थानीय तह वा सुरक्षा निकायलाई तुरुन्त जानकारी गराउन अनुरोध गरेको छ।