धनुषा । धनुषाको मिथिला नगरपालिका–११ आँपगाछी टोलमा वर्षासँगै खसेको पहिरोले घर पुरिँदा एक महिलाको मृत्यु भएको छ।

प्रहरीका अनुसार आज बिहान राजन श्रेष्ठको एकतले घरमाथि पहिरो खस्दा घरभित्र रहेकी ४२ वर्षीया कमला श्रेष्ठको मृत्यु भएको हो।

पहिरो खसेपछि घर पुरिँदा कमला घरभित्रै परेको र घटनास्थलमै उनको मृत्यु भएको प्रहरीले जनाएको छ। घरमा रहेका परिवारका अन्य चार सदस्य भने पहिरो खस्नेबित्तिकै बाहिर निस्किएर ज्यान जोगाउन सफल भएका छन्।

लगातारको वर्षाका कारण पहाडी तथा भिरालो क्षेत्रमा पहिरोको जोखिम बढिरहेका बेला मिथिला नगरपालिका–११ मा उक्त घटना भएको हो। घटनाबारे थप विवरण तथा क्षतिको अवस्थाबारे प्रहरीले आवश्यक अनुसन्धान गरिरहेको जनाएको छ।