जनकपुर - जनकपुर विमानस्थलबाट वन्यजन्तुको छाला सहित एक यात्रु पक्राउ परेका छन् । पक्राउ पर्नेमा महोत्तरी बर्दीबास नगरपालिका–११ खैरमारा घर भएका ४३ वर्षीय दोर्जे लामा रहेका छन् ।

जनकपुरधाम उपमहानगरपालिका–१२ स्थित एयरपोर्टबाट लामालाई आइतबार साँझ जनकपुर विमानस्थलबाट वन्यजन्तु सुनगोहरोको जस्तो देखिने २ थान छाला सहित प्रहरीले पक्राउ गरेको जिल्ला प्रहरी कार्यालय धनुषाले जनाएको छ। जनकपुरबाट काठमाण्डु जान लागेका लामालाई विमान स्थल प्रहरीले पक्राउ गरेको हो । प्रहरीले जाँच गर्ने क्रममा झोला भित्र उक्त छाला फेला पारेपछि उनलाई पक्राउ गरेको थियो । लामालाई प्रहरी हिरासतमा राखेर अनुसन्धान भइरहेको जिल्ला प्रहरी कर्यालय धनुषाले जनाएको छ ।