जनकपुरधाम - जनकपुरबाट ५ क्वीन्टल बढी लागुऔषध गाँजासहित एक जनालाई पक्राउ गरिएको छ । 

लागु औषध नियन्त्रण ब्यूरो शाखा बर्दिवासबाट खटेको टोलीले जनकपुर–ढल्केवर ६ लेन सडकखण्ड अन्तर्गत ५ क्वीन्टल १० किलो गाँजासहित एक जनालाई पक्राउ गरेको हो । 

शुक्रबार साँझ करिब ७ बजेको समयमा ढल्केवरबाट जनकपुरतर्फ लागु औषध (गाँजा) लैजादै गरेको भन्ने विशेष सूचनाको आधारमा लागु औषध नियन्त्रण ब्युरो शाखा कार्यालय बर्दिबास, प्रहरी चौकी लक्ष्मिनिया र जिल्ला प्रहरी कार्यालय धनुषाको संयुक्त प्रहरी टोलीले उक्त परिमाणको गाँजासहित पक्राउ गरेको हो । 

ढल्केबरतर्फबाट जनकपुरतर्फ आउदै गरेको मधेश प्रदेश–०३–००२ ख २५२० नम्बरको निलो रंगको आयसर मिनि ट्रकलाई धनुषाको लक्ष्मीनिया गाउँपालिका वडा नं. ७ लक्ष्मिनिया चौक स्थित ढल्केबर–जनकपुर सडकखण्डमा रोकी चेकजाँच गर्ने क्रममा भेटिएको हो । 

मिनिट्रकको माथिल्लो भागमा डोरी बाधी सोहि डोरी माथी रातो प्लास्टिक भित्र खैरो डोरीले बाधी लुकाई छिपाई राखी ल्याउदै गरेको अबैध लागुऔषध गाजाँ ३४ पोका गरी जम्मा ५१० किलो पक्राउ गरिएको जनाइएको छ । 

गाँजा, मिनि ट्रक र मिनि ट्रक चालक जिल्ला मकवानपुर थाहा नगरपालिका वडा नम्बर २ बस्ने बुद्धि बहादुर सिन्तानको छोरा अं बर्ष २५ को संजिव सिन्तान सहित मिनिट्रकलाई नियन्त्रणमा लिई आवश्यक कारवाहीको लागी जिल्ला प्रहरी कार्यालय धनुषा पठाइएको जनाईएको छ ।