महोत्तरी - महोत्तरी जिल्लाको औरही नगरपालिका वडा नं. १, औरही निवासी तथा औरही उद्योग वाणिज्य संघका पूर्व सह–सचिव लक्की चौधरीका पूजनीय बुवा बिन्देश्वर चौधरीको ७२ वर्षको उमेरमा माघ २४ गते शनिबार दिउँसो करिब २ बजे निधन भएको परिवारजनले जनाएका छन्।

स्वर्गीय चौधरीको अन्त्येष्टि परिवारजनको उपस्थितिमा आज बिहान १० बजे सम्पन्न भएको छ।

उहाँको निधनसँगै चौधरी परिवारसहित समग्र औरही क्षेत्र शोकमग्न बनेको छ। स्वर्गीय चौधरी समाजमा सरल, शान्त र सहयोगी स्वभावका व्यक्तित्वका रूपमा परिचित रहनुहुन्थ्यो। सामाजिक सद्भाव, आपसी मेलमिलाप र मानवीय मूल्य–मान्यताको प्रवर्द्धनमा उहाँको योगदान स्थानीयवासीहरूले सधैं सम्झने बताए।

औरही उद्योग वाणिज्य संघका पूर्व अध्यक्ष श्रवन चौधरीले भने, “बिन्देश्वरजीको निधनले हाम्रो समाज र उद्योग वाणिज्य क्षेत्रमा अपूरणीय क्षति पुगेको छ। उहाँको सरल र सहयोगी स्वभाव सधैं हामी सबैका लागि प्रेरणाको स्रोत रहिरहनेछ। उहाँको आत्माको चिरशान्तिको कामना गर्दछौं।”

औरही उद्योग वाणिज्य संघका सल्लाहकार दिगम्बर चौधरीले भने, “बिन्देश्वरजीको सरल, विनम्र र सहयोगी स्वभावले समाजमा सदैव उदाहरण प्रस्तुत गरेको छ। उहाँको निधनले उद्योग वाणिज्य क्षेत्र र स्थानीय समाज दुवैमा ठूलो क्षति पुगेको छ। उहाँको योगदान सदैव स्मरणीय रहनेछ।”

औरही नगरपालिका–१ का पूर्व वडा अध्यक्ष राजकिशोर चौधरीले भने, “बिन्देश्वरजीले समाजमा सद्भाव कायम राख्न जीवनभर योगदान दिनुभयो। उहाँको निधनले हाम्रो गाउँ र समुदायमा ठूलो क्षति पुगेको छ। उहाँको आत्माले शान्ति पाओस् भन्ने हाम्रो हार्दिक कामना छ।”

लोसपा पार्टीका नगर संयोजक दरेश यादवले भने, “उहाँ समाजका लागि सधैं उदाहरणीय व्यक्तित्व हुनुहुन्थ्यो। बिन्देश्वरजीको निधनले समाजमा ठूलो शून्यता पैदा भएको छ। उहाँको योगदान सधैं स्मरणीय रहनेछ।”

उहाँको निधनप्रति स्थानीय जनप्रतिनिधि, सामाजिक अगुवा, उद्योगी–व्यवसायी तथा सर्वसाधारणले गहिरो दुःख व्यक्त गर्दै हार्दिक श्रद्धाञ्जली अर्पण गरेका छन्।

स्वर्गीय बिन्देश्वर चौधरीको आत्माको चिरशान्तिको कामना गर्दै शोकसन्तप्त परिवारलाई यस अपूरणीय क्षति सहन सक्ने शक्ति प्राप्त होस् भन्ने कामना गरिएको छ।