विराटनगर – सुनसरीको देवानगञ्जमा प्रहरीको गोली लागेर मृत्यु भएका दुई युवाको शव पोस्टमार्टमपछि आफन्तले बुझेका छन् । आइतबार दुई समूहको विवादका क्रममा प्रहरीले चलाएको गोली लागेर सोही दिन ओमप्रकाश मेहताको मृत्यु भएको थियो । उपचारका क्रममा जयप्रकाश मेहताको बिहीबार मृत्यु भएको थियो ।  शुक्रबार  कोशी अस्पताल विराटननगरमामा पोस्टमार्टमपछि आफन्तले शव बुझेका हुन् ।

यसअघि विराटनगरकै न्यूरो अस्पतालमा राखिएको शवलाई पोस्टमार्टमका लागि कोशी अस्पताल लगिएको थियो । शुक्रबार बिहान  पीडित पक्ष र सरकारबीच ७ बुँदे सहमति भएपछि आफन्तले शव उठाउन र बुझ्न सहमति जनाएका थिए । पोस्टमार्टमपछि शव बुझेसँगै आफन्तले अन्तिम संस्कारका लागि शव आफ्नो गाउँतर्फ लगेका छन् । गाडीमा राखेर शवयात्रा गर्दै कप्तानगञ्ज लगिएको हो । आजै उनीहरूको अन्त्यष्टि हुनेछ ।

शुक्रबार सरकारले पीडित परिवारलाई राहत दिने, सहिद घोषणा गर्ने, घटनाको निष्पक्ष छानबिन र दोषीमाथि कारबाही गर्ने लगायत विषयमा सरकार र पीडित परिवारबीच सहमति भएको थियो ।