विनोद महतो,महेन्द्रनगर। धनुषाको मिथिला नगरपालिका वडा नं. २ नक्टाझिजस्थित हिमालय युवा क्लवको आयोजनामा भईरहेको नगरस्तरिय फुटबल प्रतियोगिताको आज दोस्रो दिन हिमालय युवा क्लव ‘ए’ टिम र धनुषाधाम नगरपालिकाको किसानपुरबीच खेल हुनेछ । आजको खेल ३ बजेपछि सुरु हुने बताइएको छ । यस अघि शनिवार भएको उद्घाटन खेलमा हिमालय युवा क्लव नक्टाझिज ‘बी’ टिम र हनुमान युवा क्लव बटेश्वरबीच प्रतिस्पर्धा भएको थियो । जसमा हिमालय युवा क्लवले हनुमान युवा क्लवलाई ०–८ गोलले पराजित गरेको थियो । फुटबल प्रतियोगितामा जम्मा ८ वटा फुटबल टिमको सहभागिता रहेको आयोजक हिमालय युवा क्लवले जनाएको छ । प्रतियोगितामा हिमालय युवा क्लव नक्टाझिज ‘ए’ र ‘बी’ टिम, हनुमान युवा क्लव बटेश्वर, किसानपुर फुटबल टिम, श्री जनता युवा क्लव हरिहरपुर, बुद्धि युथ क्लव मरधर मगर टोल, रतनपुर फुटबल टिम र ढल्केवर फुटबल टिमको सहभागिता रहेको छ । यस्तै प्रतियोगिता अन्तर्गत साउन २५ गते श्री जनता युवा क्लव हरिहरपुर र बुद्धि युथ क्लव मगरटोलीबीच खेल हुनेछ भने साउन २६ गते रतनपुर र ढल्केवरबीच खेल हुने तालिका रहेको छ । अन्तर्राष्ट्रिय युवा दिवसको अवसरमा साउन २३ गतेदेखि शुरु भएको सो प्रतियोगिताको फाइनल खेल ३० गते हुने आयोजकले जनाएको छ । प्रतियोगिता हिमालय युवा क्लव मिथिला नगरपालिका वडा न. २ नक्टाझिजस्थित विश्वकर्माचौक भन्दा पश्चिम पट्टी रहेको बसही खोलाको किनारमा हिमालय खेल मैदानमा भईरहेको छ ।