जनकपुर : जिल्ला प्रशासन कार्यालय धनुषाबाट तीनजना बिचौलिया (दलाल) लाई प्रहरीले पक्राउ गरेको छ । पक्राउ पर्नेमा जनकपुरधाम उपमहानगरपालिका वडा नम्बर ४ बस्ने ३६ वर्षीय गुड्डु पुर्वे, जनकपुरधाम वडा नम्बर १० बस्ने ५० वर्षीय विजयकुमार साह र जनकपुरधाम वडा नम्बर १ बस्ने ३५ वर्षीय विजय मण्डल रहेका छन् । उनीहरुले जनकपुरधाम उपमहानगरपालिका वडा नम्बर ४ स्थित रहेको जिल्ला प्रशासन कार्यालय धनुषा पुग्ने सेवाग्राहीलाई छिटो र छरितो काम गराइदिने भन्दै रकम माग्दै गरेको अवस्थामा पक्राउ गरिएको धनुषाका प्रहरी प्रवक्ता तथा प्रहरी नायव उपरीक्षक जितेन्द्रकुमार बस्नेतले जानकारी दिए । पक्राउ परेका तीनैजनालाई जिल्ला प्रहरी कार्यालय धनुषाको हिरासतमा राखी थप अनुसन्धान भइरहेको डीएसपी बस्नेतले बताए ।