धनुषा- धनुषामा दुई मोटरसाईकल एकआपसमा ठोक्किदा एकजनाको मृत्यु भएको छ भने एकजना घाइते भएका छन् ।

शनिवार साँझ दुई मोटरसाईकल एकआपसमा ठोक्किएर दुर्घटना हुँदा धनुषाको धनुषाधाम नगरपालिका–६ मालटोलका ४२ बर्षीय रामबहादुर गोले मगरको मृत्यु भएको ईलाका प्रहरी कार्यालय ढल्केवरले जनाएको छ ।

पूर्वपश्चिम लोकमार्ग अन्तर्गत धनुषाको धनुषाधाम नगरपालिका–६ मालटोलस्थित पश्चिमबाट पूर्वतर्फ जाँदै गरेको बा.७४ प ७५३९ नम्बरको मोटरसाइकल र विपरित दिशाबाट आउँदै गरेको ज.१२ प १६७२ नम्बरको मोटरसाइकल एकआपसमा ठोक्किदा दुर्घटना भएको ईलाका प्रहरी कार्यालय ढल्केवरका प्रहरी निरीक्षक प्रदिप सुवेदीले जानकारी दिए ।

उनका अनुसार दुर्घटनामा परेर गम्भिर घाइते भएका ज.१२ प १६७२ नम्बरको मोटरसाइकल चालक मगरको धनुषाको लालगढस्थित मोडेल हस्पिटलमा उपचारको क्रममा मृत्यु भएको हो । दुर्घटनामा अर्का गम्भिर घाइते बा.७४ प ७५३९ नम्बरको मोटरसाइकल चालक सिरहाको कर्जन्हा नगरपालिका–५ बस्ने २४ बर्षीय अभिषेक घिमिरेको मोडेल हस्पिटलमै उपचार भइरहेको प्रहरी निरीक्षक सुवेदीले जनाए ।

दुर्घटनामा परेका दुवै मोटरसाइकल प्रहरी नियन्त्रणमा रहेको ईलाका प्रहरी कार्यालय ढल्केवरले जनाएको छ ।