ढल्केवर, धनुषा धनुषाको धारापानीमा सञ्चालित ‘दोस्रो अन्तर नगरपालिका मेयर कप–२०७८’ फुटबल प्रतियोगिता अन्तर्गत आइतबार भएको दोस्रो क्वाटर फाइनल खेलमा मिथिला नगरपालिका फुटबल टीमले जित हासिल गरेको छ । धनुषाधाम नगरपालिका फुटबल टीमलाई शुन्यका विरुद्ध दुई गोलले हराउँदै मिथिला नगरपालिका फुटबल टीमले जीत हासिल गरेका हुो । जीतसँगै मिथिला नगरपालिका फुटबल टीम सेमिफाइनलमा प्रवेश गरेको छ । विजयी टीमका लागि अनुभवी फुटबल खेलाडी टंकु लामाले खेल सुरु भएको १६ औं मिनटमा पहिलो गोल गरेका थिए भने दोस्रो गोल खेलको ७० औं मिनटमा अनिल पाचेमगरले गरेका थिए । अनिल पाचेमगर खेलको म्यान अफ दि म्याचसमेत भए । उनलाई धनुषाधाम नगरपालिका वडा नम्बर ९ का वडा अध्यक्ष सञ्जिव यादवले म्यान अफ दि म्याचको ट्रफी प्रदान गरेको थियो । धनुषाधाम नगरपालिकाको आयोजना तथा यज्ञभूमि युवा समाज धारापानीको संयोजकत्वमा ‘दोस्रो अन्तर नगरपालिका मेयर कप–२०७८’ फुटबल प्रतियोगिता धारापानीमा शनिबारबाट सुरु भएको छ । प्रतियोगितामा गणेशमान चारनाथ, सबैला, मिथिला, धनुषाधाम, विदेह, क्षीरेश्वरनाथ, शहिदनगर नगरपालिका गरी नौवटा फुटबल टीमले भाग लिएको छ । फागुन २१ गते सुरु भएको फुटबल प्रतियोगिता फागुन २८ गतेसम्म चल्ने यज्ञभूमि युवा समाज धारापानीका अध्यक्ष कल्याणकुमार खड्काले जानकारी दिए ।