धनुषा क्षेत्र नम्बर–४ बाट निर्वाचित राष्ट्रिय स्वतन्त्र पार्टी (रास्वपा) का सांसद राजकिशोर महतोले नगर क्षेत्रमा सरसफाइ अभियान सञ्चालन गर्दै आफ्नो कामको औपचारिक थालनी गरेका छन्। निर्वाचित भएको केही समयमै उनले प्रत्यक्ष रूपमा जनतासँगै सडक र सार्वजनिक स्थल सरसफाइमा सहभागी हुँदै जिम्मेवारीप्रति प्रतिबद्धता देखाएका हुन्।
सांसद महतोले “राजनीति केवल भाषण र आश्वासनमा सीमित हुनु हुँदैन, जनताको बीचमा गएर कामबाट उदाहरण देखाउनुपर्छ” भन्ने सन्देश दिन खोजेको बताएका छन्। उनले नगर क्षेत्रको सडक, बजार तथा सार्वजनिक स्थान सफा गर्ने अभियानमा स्थानीय युवाहरू र सर्वसाधारणलाई समेत सहभागी गराएका थिए।
सामान्यतया सरकार गठनपछि योजनाबद्ध रूपमा विकासका काम सुरु हुने अपेक्षा गरिन्छ। तर यसपटक सांसद महतोले सरकारको प्रतीक्षा नगरी आफैँ पहल गर्दै सरसफाइ अभियान सुरु गरेका कारण यसलाई सकारात्मक सन्देशका रूपमा हेरिएको छ।
देशका विभिन्न क्षेत्रबाट निर्वाचित धेरै नेताहरूले अझै औपचारिक रूपमा कामको शुरुआत नगरेको अवस्थामा महतोले गरेको यो पहललाई स्थानीय बासिन्दाले उदाहरणीय कदमका रूपमा लिएका छन्। सामाजिक सञ्जालदेखि स्थानीय समुदायसम्म उनको कार्यशैलीको व्यापक प्रशंसा भइरहेको छ।
स्थानीय नागरिकहरूका अनुसार, जनप्रतिनिधि स्वयं मैदानमा उत्रिएर काम सुरु गर्दा जनतामा पनि उत्साह बढ्ने र विकासप्रति विश्वास बलियो हुने विश्वास व्यक्त गरेका छन्।
राजकिशोर महतोको यो पहलले “पहिले काम, त्यसपछि प्रचार” भन्ने सन्देश दिएको भन्दै धेरैले यसलाई नयाँ राजनीतिक संस्कृतिको संकेतका रूपमा व्याख्या गरेका छन्।