नवीन कुमार चौधरी, महोत्तरी – गत फागुन २१ गते सम्पन्न प्रतिनिधिसभा निर्वाचनमा १०८ वर्षको उमेरमा मतदान गरी लोकतान्त्रिक अधिकार प्रयोग गर्नु भएकी महोत्तरीको जलेश्वर नगरपालिका–५ चौरियाकी जानकीदेवी महरालाई जिल्ला प्रशासन कार्यालय महोत्तरीले सम्मान गरेको छ।

उच्च उमेर हुँदाहुँदै पनि मतदान केन्द्रमा पुगेर मताधिकार प्रयोग गरेकाले उहाँलाई सम्मान गरिएको हो। जिल्ला प्रशासन कार्यालय महोत्तरीले जानकीदेवीलाई दोसल्ला ओढाएर सम्मान गर्नुका साथै खाद्यान्न सामग्री समेत प्रदान गरेको प्रमुख जिल्ला अधिकारी इन्द्रदेव यादवले जानकारी दिनुभयो।

प्रमुख जिल्ला अधिकारी यादवले वयोवृद्ध अवस्थामासमेत लोकतान्त्रिक प्रक्रियामा सक्रिय रूपमा सहभागी भएको भन्दै जानकीदेवीको प्रशंसा गर्नुभयो। उहाँले यस्तो उदाहरणले लोकतन्त्रप्रति नागरिकको जिम्मेवारी र सहभागिताको महत्व झल्काउने बताउनुभयो।
“१०८ वर्षको उमेरमा समेत मतदानमा सहभागी हुनु अत्यन्त प्रेरणादायी कुरा हो। उहाँको सक्रियताले अन्य नागरिकलाई पनि मतदानप्रति जिम्मेवार बन्न प्रेरणा दिनेछ,” प्रजिअ यादवले भन्नुभयो।

वयोवृद्ध अवस्थामासमेत लोकतन्त्रप्रति देखाएको प्रतिबद्धता र सहभागिताले समाजका अन्य नागरिकलाई पनि लोकतान्त्रिक प्रक्रियामा सक्रिय हुन प्रेरित गर्ने अपेक्षा प्रशासनले लिएको छ।