काठमाडौँ - मधेस प्रदेशका मुख्यमन्त्री सरोज कुमार यादवको नियुक्तिको विरोधमा आन्दोलन घोषणा गरिएको छ । 

नेकपा माओवादी केन्द्र,जसपा नेपाल,जनमत पार्टी,लोसपा नेपाल र जसपा नेपालका नेताहरूले शुक्रबार विज्ञप्ति जारी गर्दै आन्दोलन घोषणा गरेका हुन् । 

गत शनिबार तत्कालीन मधेस प्रदेश प्रमुख सुमित्रा सुवेदी भण्डारीले असंवैधानिक तरिकाबाट यादवलाई मुख्यमन्त्रीमा नियुक्त गरी होटल (रेस्टुरेन्ट) जस्ता संवेदनशील स्थलमा शपथ ग्रहण गराएको घटना निन्दनीय र घिन लाग्दो रहेको उनीहरूको ठहर छ । 

अहिले मधेस प्रदेशमा गैर संवैधानिक तरिकाले रातारात संविधानको चीरहरण गरी संविधान, सङ्घीयता र सङ्घीय लोकतान्त्रिक गणतन्त्रलाई बदनाम गराउने, मधेसी जनताको अधिकार हनन् गर्ने संविधानको मूल मर्ममाथि प्रहार गर्ने प्रतिगमनकारी कदमको घोर भर्त्सना समेत दलहरूले गरेका छन् ।

साथै गैर संवैधानिक तरिकाले नियुक्त भई रेस्टुरेन्टमा शपथ ग्रहण गरेका मुख्यमन्त्रीलाई बर्खास्त गरी संविधान, सङ्घीयता र सङ्घीय लोकतान्त्रिक गणतन्त्र संरक्षणका लागि सम्पूर्ण मधेस प्रदेशवासीलाई विरोध तथा शान्तिपूर्ण आन्दोलनमा सहभागीताका लागि आग्रह गरेका छन् । 

शनिबार साँझ सर्लाहीकाे मलंगवास्थित सहिद चोकमा मसाल जुलुस र आइतबार बिहान ११ बजेदेखि खबरदारी जुलुसको घोषणा गरिएको छ ।