महोत्तरी – छठ पर्व नजिकिँदै गर्दा महोत्तरीको औरही नगरपालिकाले नगर क्षेत्रका दुई प्रमुख छठघाटस्थित पोखरीको सरसफाइ सुरु गरेको छ । जलकुम्भी र फोहोरले भरिएका पोखरीको अवस्थाबारे समाचार सार्वजनिक भएपछि नगरपालिकाले चासो देखाउँदै बुधबारदेखि सरसफाइ अभियान अघि बढाएको हो ।

नगरपालिकाले औरही नगरपालिका–१ स्थित औरही गाउँको पूर्वपट्टि रहेको पोखरी र वडा नं. २ स्थित श्री प्रसाद सिंह नमुना माध्यमिक विद्यालयको पछाडि रहेको पोखरीमा सरसफाइ सुरु गरेको हो । दुवै पोखरीमा फैलिएको जलकुम्भी हटाउने, फोहोर सफा गर्ने तथा छठ पर्वका लागि आवश्यक व्यवस्थापन मिलाउने काम भइरहेको नगर प्रमुख प्रदीपकुमार खड्काले जानकारी दिनुभयो ।

यस वर्ष कात्तिक २९ गते छठ पर्व मनाइँदैछ । पर्वका लागि व्रतालु तथा श्रद्धालु भक्तजनको चहलपहल बढ्ने भएकाले त्यसअघि नै पोखरी र घाटको सरसफाइ सम्पन्न गर्ने तयारी गरिएको नगर प्रमुख खड्काले बताउनुभयो । उहाँका अनुसार दुवै पोखरीको नयाँ ठेक्काका लागि नगरपालिकाले आवेदनसमेत खुला गरिसकेको छ ।

छठ पर्व नगरवासीको धार्मिक आस्था, सांस्कृतिक पहिचान र सामाजिक एकतासँग जोडिएको महत्वपूर्ण पर्व भएकाले यसको व्यवस्थापनलाई प्राथमिकतामा राखिएको नगर प्रमुख खड्काको भनाइ छ । उहाँले नगरवासीले स्वच्छ, सुरक्षित र व्यवस्थित वातावरणमा छठ पूजा गर्न पाउने गरी आवश्यक तयारी भइरहेको बताउनुभयो ।

“नगरवासीले आफ्नो आस्था र परम्पराअनुसार स्वच्छ, सुरक्षित र व्यवस्थित वातावरणमा छठ पूजा गर्न पाउनुपर्छ भन्ने हाम्रो उद्देश्य हो । त्यसैले पोखरीको सरसफाइलाई प्राथमिकतामा राखेर काम सुरु गरेका छौँ,” उहाँले भन्नुभयो, “छठ पर्वअघि नै आवश्यक सरसफाइ तथा व्यवस्थापनका काम सम्पन्न गर्न नगरपालिका प्रतिबद्ध छ । पोखरीको दीर्घकालीन संरक्षण र व्यवस्थापनमा समेत ध्यान दिइनेछ ।”

पोखरीमा जलकुम्भी फैलिएको र फोहोर जमेको अवस्थाले छठ पर्वमा पूजा गर्न आउने व्रतालु तथा श्रद्धालुलाई समस्या हुने भन्दै स्थानीयवासीले सरसफाइको माग गर्दै आएका थिए । पोखरीको अवस्थाबारे सञ्चारमाध्यममा समाचार सार्वजनिक भएपछि नगरपालिकाले सरसफाइ सुरु गरेको हो । सरसफाइ कार्य अघि बढेसँगै यस वर्ष स्वच्छ वातावरणमा छठ पूजा गर्न पाइने आशा स्थानीयवासीमा पलाएको छ ।

औरही नगरपालिका–१ निवासी रामवरण मण्डलले छठ पर्वमा ठूलो सङ्ख्यामा श्रद्धालु भक्तजन सहभागी हुने भएकाले पोखरीको स्वच्छता र घाटको व्यवस्थापन अत्यन्त आवश्यक रहेको बताउनुभयो । लामो समयदेखि जलकुम्भी र फोहोरले भरिएका पोखरीका कारण व्रतालु तथा श्रद्धालुलाई पूजा गर्न कठिनाइ हुने अवस्था रहेको उहाँले उल्लेख गर्नुभयो ।

“पोखरीमा जलकुम्भी र फोहोर जमेको अवस्थाले छठ पूजा गर्न आउने श्रद्धालुलाई समस्या हुने अवस्था थियो । समाचारमार्फत समस्या उजागर भएपछि नगरपालिकाले सरसफाइ सुरु गर्नु खुसीको कुरा हो,” मण्डलले भन्नुभयो,“तर सरसफाइलाई पर्वसम्मका लागि मात्र सीमित नराखी पोखरीको नियमित संरक्षण र व्यवस्थापनमा समेत ध्यान दिनुपर्छ ।”

त्यसैगरी, औरही नगरपालिका–२ निवासी हरि यादवले छठ पर्वअघि नै पोखरीसँगै घाटको समग्र व्यवस्थापन पूरा गर्नुपर्ने बताउनुभयो । पोखरी सफा गरेर मात्र नपुग्ने भन्दै उहाँले घाटसम्म पुग्ने बाटो, पर्याप्त प्रकाश र अन्य आवश्यक सुविधाको व्यवस्था मिलाउनुपर्नेमा जोड दिनुभयो ।

यो पनि पढ्नुहोस : – जलकुम्भीले भरिए औरहीका दुई छठघाट,सरसफाइमा नगरपालिकाको बेवास्ता

उहाँका अनुसार छठ पर्वका बेला बालबालिका, ज्येष्ठ नागरिक, महिला तथा ठूलो सङ्ख्यामा श्रद्धालु भक्तजन घाटमा पुग्ने भएकाले आवागमन सहज र सुरक्षित हुनुपर्छ । घाटमा पर्याप्त बत्तीको व्यवस्था नहुँदा साँझ र बिहानको समयमा समस्या हुन सक्ने भएकाले त्यसतर्फ पनि नगरपालिकाले ध्यान दिनुपर्ने उहाँको भनाइ छ ।

औरही नगरपालिका–२ निवासी घनश्याम यादवले पनि छठ पर्वको धार्मिक तथा सांस्कृतिक महत्वलाई ध्यानमा राखेर पोखरीको सरसफाइ र संरक्षणलाई नियमित बनाउनुपर्ने बताउनुभयो । समाचार सार्वजनिक भएपछि सरसफाइ सुरु हुनु सकारात्मक भए पनि आगामी दिनमा यस्ता समस्या दोहोरिन नदिन नियमित अनुगमन र व्यवस्थापन आवश्यक रहेको उहाँले धारणा राख्नुभयो ।

छठघाटको सरसफाइ सुरु भएपछि स्थानीय व्रतालु तथा श्रद्धालु भक्तजनले नगरपालिकाको पहलको स्वागत गरेका छन् । उनीहरूले सरसफाइ कार्यलाई पर्वअघि नै पूर्णता दिनुका साथै घाट आसपासमा थुप्रिएको फोहोर व्यवस्थापन, पर्याप्त बत्ती जडान, आवागमनको सहजता र व्रतालुका लागि आवश्यक सुविधा उपलब्ध गराउन आग्रह गरेका छन् ।

स्थानीयवासीका अनुसार छठ पर्व वर्षमा एक पटक आउने भएकाले यसको तयारी र व्यवस्थापनलाई विशेष प्राथमिकता दिनुपर्छ । पोखरीको जलकुम्भी हटाएर पानी सफा गर्ने, घाटको सरसफाइ गर्ने र आसपासको वातावरण स्वच्छ राख्ने कामसँगै सुरक्षा व्यवस्थापनमा पनि ध्यान दिन आवश्यक छ । विशेषगरी छठको पहिलो दिन अस्ताउँदो सूर्य र दोस्रो दिन उदाउँदो सूर्यलाई अर्घ्य दिन ठूलो सङ्ख्यामा श्रद्धालु पोखरी तथा जलाशयमा पुग्ने भएकाले व्यवस्थापनमा कुनै कमी हुन नहुने उनीहरूको भनाइ छ ।

मधेश प्रदेशमा विशेष श्रद्धा र आस्थाका साथ मनाइने छठ पर्वमा व्रतालुहरूले नदी, पोखरी तथा अन्य जलाशयमा पुगेर अस्ताउँदो र उदाउँदो सूर्यलाई अर्घ्य दिने परम्परा छ । यस पर्वमा बाँसका ढक्की, डालो, सुप्पा र अन्य पूजासामग्रीसँगै स्वच्छ जलाशय तथा व्यवस्थित घाटको विशेष महत्व रहन्छ । त्यसैले छठ पर्वको तयारीमा पोखरी र घाटको सरसफाइलाई महत्वपूर्ण मानिन्छ ।

औरही नगरपालिकाका दुवै पोखरीमा यस वर्ष उल्लेख्य सङ्ख्यामा व्रतालु तथा श्रद्धालु भक्तजन सहभागी हुने अपेक्षा गरिएको छ । त्यसैले जलकुम्भी हटाउने र फोहोर व्यवस्थापन गर्ने कामसँगै घाटको मर्मतसम्भार, प्रकाश, खानेपानी, आवागमन र सुरक्षालगायत आवश्यक व्यवस्था समयमै मिलाउनुपर्ने स्थानीयको माग छ ।

स्थानीय समस्याबारे सञ्चारमाध्यमले समाचार प्रकाशित गरेपछि सम्बन्धित निकायको ध्यानाकर्षण भई समाधानका लागि पहल सुरु भएको यस घटनाले नागरिकका सरोकारका विषयमा सञ्चारमाध्यमको खबरदारीपूर्ण भूमिका पनि उजागर गरेको छ । सार्वजनिक सरोकारका विषयलाई निरन्तर उठान गर्दा स्थानीय तहलाई जिम्मेवार बनाउन र नागरिकले अपेक्षा गरेको सेवा प्रवाहमा सुधार ल्याउन सहयोग पुग्ने स्थानीयवासीको विश्वास छ ।