मोटरसाइकलको ठक्करबाट प्रहरी निरीक्षक कपिल वाग्लेको मृत्यु भएको छ । नवलपरासीको बर्दघाटमा सोमबार राति साढे आठ बजेतिर तीव्र गतिमा रहेको मोटरसाइकलको ठक्करबाट वाग्ले गम्भीर घाइते भएका थिए । उनको सोमबार राति ११ बजे भैरहवास्थित युनिभर्सल मेडिकल कलेजमा उपचारका क्रममा मृत्यु भएको हो । इलाका प्रहरी कार्यालय बर्दघाटमा कार्यरत वाग्लेलाई सोमबार पूर्व-पश्चिम महेन्द्र राजमार्गको बर्दघाटको त्रिवेणी चोक नजिकै पैदल हिँडिरहेको अवस्थामा लु १४ प ८७५८ नम्बरको को मोटरसाइकलले ठक्कर दिएको थियो । मोटरसाइकलको ठक्करपछि गम्भीर घाइते भएका वाग्लेको स्थानीय प्राथमिक उपचार केन्द्रमा उपचारपछि भैरहवास्थित युनिभर्सल मेडिकल कलेज ल्याइएको थियो । इलाका प्रहरी कार्यालय बर्दघाटका अनुसार बाग्लेलाई ठक्कर दिने मोटरसाइकल चालक सुनवल नगरपालिका वडा नं. १ का दिपेन्द्र पुन मगर पनि गम्भिर घाइते छन् । उनको पनि सोही मेडिकल कलेजमा उपचार भइरहेको प्रहरीले जनाएको छ ।