काठमाडौँ । काठमाडौँको थापाथलीस्थित बागमती किनारका सुकुमबासी बस्तीमा सरकारले चलाउन लागेको डोजर र सुरक्षा निकायको परिचालनविरुद्ध जेनजी मुभमेन्ट एलायन्सले विरोध प्रदर्शन गर्ने भएको छ । एलायन्सले शुक्रबार बिहान ११ बजेदेखि थापाथली क्षेत्रमा मानव साङ्लो बनाएर घेराउ गर्ने कार्यक्रम सार्वजनिक गरेको हो ।

भूमिहीन तथा सुकुमबासीहरूमाथि भएको दमनकाविरुद्ध उत्रिएको यो युवा समूहले बस्तीहरूमा त्रास फैलाउने कार्य तत्काल रोक्न माग गरेको छ । संविधानले ग्यारेन्टी गरेको आवासको हक र नागरिकको सम्मानपूर्वक बाँच्न पाउने अधिकारको ठाडो उल्लङ्घन भएको ठहर गर्दै एलायन्सले विपन्न नागरिकलाई घरबारविहीन बनाउने अमानवीय निर्णय खारेज गर्न सरकारलाई दबाब दिएको छ ।

आन्दोलनकारीहरूले राजनीतिक आडमा सुकुमबासीका नाममा बसेका हुनेखाने र वास्तविक भूमिहीनबिचको पहिचान गर्नुपर्नेमा जोड दिएका छन् । यसका लागि अधिकार सम्पन्न उच्चस्तरीय आयोगमार्फत निष्पक्ष छानबिन र प्रमाणीकरण गरेर मात्र अघि बढ्न उनीहरूको सुझाव छ। जथाभाबी डोजर चलाउनुको सट्टा दीर्घकालीन र न्यायोचित समाधान खोजिनुपर्ने माग एलायन्सको छ ।
कुनै पनि ठोस निर्णय लिनुअघि सुकुमबासी प्रतिनिधि, नागरिक समाज र विज्ञहरूसँग बसेर संवादको माध्यमबाट निकास खोज्न युवाहरूले सरकारलाई आग्रह गरेका छन् । थापाथलीमा सुरक्षाकर्मी र मेसिन परिचालन गरेर आतंक सिर्जना गरिएको भन्दै यसका विरुद्ध एकजुट हुन एलायन्सले आह्वान गरेको छ ।